АМАЛӢ ШУДАНИ 8 ЛОИҲА ДАР СОҲАИ КИШОВАРЗӢ

Душанбе, 22 июн. (АМИТ «Ховар», Лаззат Диловарзод).-  Бино ба гуфти вазири кишоварзӣ Қосим Қосимов, айни замон бо дастгирии институтҳои байналмилалии молиявӣ дар Ҷумҳурии Тоҷикистон 8 лоиҳа бо маблағи умумии 150 млн. доллар амалӣ гардонида мешавад. Солҳои охир аз ҷониби Ҳукумати ҷумҳурӣ 12 барнома оид ба рушди соҳаи кишоварзӣ маблағгузорӣ мегардад. Бо мақсади амалӣ гардидани барномаҳо, Вазорати кишоварзӣ як қатор қонунҳоро дар бораи беҳтар кардани шароити меҳнат дар соҳаи кишоварзӣ кор карда баромада ба Ҳукумати ҷумҳурӣ пешниҳод намуд. Аз соли гузашта  сар  карда, вазорат  барномаи муштараки  ислоҳоти кишоварзиро барои 5- 10 соли наздик кор карда баромада, барои   дида баромадан   ба Ҳукумати ҷумхурӣ пешниҳод кардааст. Ҳамчунин ин барномаи муштараки ислоҳоти кишоварзӣ барои омӯзиш ба донорҳои байналмиллалӣ низ пешниҳод гардидааст.