БОЗДОШТИ ДОНИШҶӮ БО ҶУРМИ НАШЪА

Душанбе, 16 июн. (АМИТ «Ховар», Жасмин Назарова). – 670 грамм маводи нашъа дар шимоли ҷумҳурӣ ёфт ва мусодира карда шуд. 15 июн кормандони Шӯъбаи мубориза бар зидди гардиши ғайриқонунӣ дар вилояти Суғд ҳангоми гузарондани чораҳои фаврӣ-ҷустуҷӯӣ дар назди автовокзали шаҳри Хуҷанд, автомашинаи тамғаи «Опел-Астра» рақами давлатиаш ЕУ 6202 02/РТ таҳти идоракунии  ронанда, истиқоматкунандаи шаҳраки Нови ноҳияи Спитамен,  донишҷӯи  бахши 4-уми Донишгоҳи Давлатии Тиҷоратии Тоҷикистон шаҳри Хуҷанд Муродбек Раҷабови 23 – соларо бо гумони даст доштан дар  гардиши ғайриқонунии  маводи  нашъадор боздошт намуданд.   Ҳангоми  азназаргузаронии автомашинаи мазкур аз таги курсии ҷойи нишасти ронанда маводи нашъадори навъи ҳашиш, ки вазнаш 670 граммро ташкил медод, дарёфт ва мусодира карданд. Тавре аз дафтари матбуоти Вазорати корҳои дохилии ҶТ иттилоъ доданд, ки маводи мазкурро шаҳрванд М. Раҷабов аз шаҳрванд Рамис Эвазови 28-сола, истиқоматкунандаи ноҳияи Мастчоҳ, гирифтааст. Нисбати ин ҳодиса парвандаи ҷиноӣ оғоз шуда, тафтишот идома дорад.