ЧЕҲРАИ ТОБОНИ ИЛМИ ШАРҚШИНОСӢ

Душанбе, 16 июн. (АМИТ «Ховар», Лутфия Эшонқулова).- Сафири Тоҷикистон дар Федератсияи Руссия Абдулмаҷид Достиев муҳаққиқи шинохтаи тоҷик, филолог-шарқшинос Лола Саломатшоеваро бо ҷашни 75-солагиаш табрик намуда, ба ӯ барқияи шодбошӣ фиристод. Дар барқияи мазкур сафир аз корҳои назарраси Л.Саломатшоева дар рушду нумуи илми муосири тоҷик, махсусан бахши шарқшиносӣ ёдовар шуда,  ӯро яке аз чеҳраҳои шинохтаи илми шарқшиносӣ арзбёбӣ намудааст. Бояд қайд кард, ки Лола Саломатшоева донандаи забонҳои форсӣ, англисӣ ва лотинӣ мебошад. Солҳои зиёд ӯ роҳбарии кафедраи забони лотинии Институти давлатии тиббии ба номи Абуалӣ ибни Сино иҷро мекард. Ба қалами ӯ се монография ва як қатор мақолаҳои илмӣ, тавсифи дастнависҳо тааллуқ дорад, ки дар бораи густариши илми шаркшиносӣ дар соири кишварҳои ҷаҳон баҳс мекунад. Дар давоми фаъолияташ дар Академияи илмҳои Тоҷикистон  рисолаи номзадии худро дар мавзӯи «Ҳасани Деҳлавӣ ва осори ӯ» бомуваффақият дифоъ намуда, соли 1967 соҳиби унвони номзади илми филология гардид. Лола Саломатшоева муддати зиёд дар кишварҳои Афғонистон ва Эрон  кору фаъолият намуда, маводи заруриро барои корҳои илмии худ ҷамъоварӣ кардааст. Айни ҳол ӯ дар Институти шарқшиносии Академияи илмҳои Федератсияи Россия фаъолияти илмии худро идома медиҳад.