ЧОРАҲОИ ЗИДДИКОРУПСИОНӢ ПУРЗӮР КАРДА МЕШАВАНД

Душанбе, 24 июн. (АМИТ «Ховар», Лутфия Эшонқулова).- 23 июн бо дастури бевоситаи  роҳбарияти Хадамоти гумруки назди Ҳукумати Ҷумҳурии Тоҷикистон дар Донишкадаи такмили ихтисоси мазкур семинар-машварати навбатӣ бо иштироки намояндагони мақомоти гумрук, Прокуратураи Генералӣ ва Агентии назорати давлатии молиявӣ ва мубориза бо коррупсияи Ҷумҳурии Тоҷикистон доир гардид. Мавзӯи навбатии семинари мазкур дар асоси Паёми солонаи Президенти кишвар ба  Маҷлиси Олии ҷумхурӣ ва Қарори Ҳукумати Ҷумҳурии Тоҷикистон «Дар бораи Стратегияи мубориза бо коррупсия дар  солҳои 2008-2012», ҳамчунин Фармони Сардори Хадамоти гумруки назди Ҳукумати Ҷумҳурии Тоҷикистон доир ба  баргузории нақшаву чорабиниҳо оиди мубориза бо ин зуҳуроти номатлуб  ва пешгирии сўйистифода аз вазифаҳои хизматӣ дар Хадамоти гумрук ба ҳисоб рафта, барои пешгирӣ намудани фасод дар ҷомеа иштирокдорон таклифу пешниҳодҳои судманд намуданд.   Тавре ба АМИТ «Ховар» нозири калони шуъбаи иттилоотии Хадамоти гумруки назди Ҳукумати ҶТ Абдурахими Умариён  хабар дод, дар ҳоле ки коррупсия ё худ фасод, ҳамчун зуҳуроти номатлуб тамоми мамолики сайёраро ба ташвиш овардааст, таҷриба нишон медиҳад, ки содир намудани ин амали нангин аз чониби баъзе кормандони сохторҳои давлатии кишвари мо низ ба мушоҳида мерасад. Бо ҳамин мақсад, «Стратегия мубориза бар зидди коррупсия, ки дар Ҷумҳурии Тоҷикистон барои солҳои 2008-2012» қабул шудааст, қисми ҷудонашавандаи Барномаи давлатии мубориза бо ҷинояткорӣ дар кишвар барои солҳои 2008-2015 буда, алайҳи содиршавии чунин амалҳо ба роҳ монда шудааст. А.Умариён афзуд, ки бо мақсади пешгириву решакан намудани фасод дар ҷомеа тамоми мақомоти қудратии кишвар дар асоси дастуру супориш ва амру фармонҳои сарвари давлат аз тамоми имконоти мавҷуда истифода мебаранд. Дар семинар-машварате, ки дар Донишкадаи такмили ихтисоси Хадамоти гумрук доир гардид, масъулин зикр намуданд, ки таъсири коррупсия дар раванди рушди иҷтимоиву иқтисодии ҷомеа ва пешрафти дигар соҳаҳои ҳаётан муҳим таъсири калон мерасонад. Дар рафти ин ҳамоиш, бо мақсади баланд бардоштани донишу малакаи тахассусии кормандони мақомоти гумрук доир ба амалҳои зидди корупсионӣ ва ҳамзамон муборизаи дастаҷамъонаро ба роҳ мондан, намояндагони Прокуратураи генералӣ ва Агентии назорати давлатии молиявӣ ва мубориза бо коррупсияи Ҷумҳурии Тоҷикистон маърӯза намуданд.