ИЗҲОРОТИ САРВАЗИРИ ҶУМҲУРИИ ТОҶИКИСТОН

Изҳороти  Сарвазири  Ҷумҳурии                                  Тоҷикистон,  раиси Кумитаи тадорукоти Конфронси  байналмилалии намояндагони  воломақоми  мамлакатҳои  ҷаҳон дар  масъалаи  ҷамъбасти даври  аввали                      Даҳсолаи  байналхалқии амалиёти «Об  барои зиндагӣ»  дар нишасти матбуотӣ Душанбе, 9 июни соли  2010   Конфронси  байналмилалии намояндагони воломақоми  мамлакатҳои  ҷаҳон  ва  созмонҳои  мӯътабари байналхалқию  минтақавӣ  дар  масъалаи  ҷамъбасти  натиҷаҳои  даври  аввали  Даҳсолаи  байналхалқии  амалиёти  «Об  барои  зиндагӣ»  анҷом  ёфт. Тавре  Шумо  огоҳ  ҳастед,  конфронс мувофиқи  қатъномаи  Маҷмаи  кулли  СММ аз  21  декабри  соли  2009  таҳти № 64/198 дар  бораи ҷамъбасти  натиҷаҳои  даври  аввали Даҳсолаи  байналхалқии  амалиёти  «Об  барои  зиндагӣ»  гузаронида шуд. Ҳукумати  Ҷумҳурии  Тоҷикистон  конфронсро   ҳамроҳи  Созмони  Милали  Муттаҳид  ва  хусусан  муассисаи  бо  ин  мақсад  ташкилнамудаи  он  —  Даҳрӯзаи байналхалқии «СММ – Об»  баргузор  сохт. Ҳадафи  асосии конфронс  ҷамъбасти  натиҷаҳои нимаи  аввали  Даҳсолаи  байналхалқии  амалиёти  «Об  барои  зиндагӣ»  дар  давраи  солҳои  2005 – 2015,  ошкор  намудани   проблемаҳои  асосӣ  ва  андешидани  тадбирҳои  муштараки  амалӣ  сохтани  тадбирҳои  даври  дуюми  он  ва  умуман  фаъолияти  СММ  дар  масъалаи  об  мебошад. Дар  конфронс  намояндагони  80  мамлакат  ва  70  созмони  байналмилалию  минтақавӣ  иштирок  намуданд.  Дар  он  умуман  бештар  аз  500  мансабдори  баландпоя,   сиёсатмадорон,  олимон ва коршиносони  минтақаҳои гуногуни  ҷаҳон,  аз  ҷумла  Осиё,  Африқо,  Амрико,  Аврупо  ва  Уқёнусия, намояндагони  ҳукуматҳо,  муассисаҳои гуногуни  СММ,   созмонҳои  дигари байналхалқию  минтақавӣ,   молиявӣ,  муассисаҳои  илмӣ,  ташкилотҳои  ҷамъиятӣ ва  хусусӣ   иштирок намуданд. Онҳо  дар  давоми  ду  рӯз  проблемаҳои  муҳимтарини  ҷаҳони  имрӯзаи босуръат  тағйирёбандаро  мавриди  баррасӣ  қарор  доданд.  Дар  муҳокимаи  проблемаи  мазкур   қариб  200 намояндаи  Тоҷикистон  ширкат  варзид. Дар  ҷараёни  конфронс  ду  маҷлиси  умумӣ,  6  машварат, 4  маҳфили  махсус,  намоишгоҳи байналхалқии «Об  барои  зиндагӣ»  намоишгоҳи  расму  суратҳои  бачагона  ва  ғайра  ташкил  карда шуданд. Дар  маросими  ифтитоҳи  конфронс  Президенти  Ҷумҳурии  Тоҷикистон,  мӯҳтарам Эмомалӣ  Раҳмон  сухан  кард.  Ҷаноби  Президент  ҷиҳатҳои  муҳимтарини   проблемаҳои  марбут ба   об   ва  нуқтаи  назари  худро  дар  бораи  ҳамкори дар  ҳалли  онҳо  баён  намуд.  Дар  ин  маврид  ба  проблемаҳои  марбут ба  идораю  истифода  ва  ҳифзи  захираҳои оби   Тоҷикистон  низ   сухан  рафт. Муовини Муншии  умумии  СММ,  ҷаноби  Шо Сзукон дар  ҳузури   иштирокчиёни  конфронс  паёми Муншии  умумии  СММ,  мӯҳтарам   Пан  Ги  Мунро  қироат  кард.  Дар  паёми  Муншии  умумии  СММ   изҳори  боварӣ  карда  мешавад, ки   конфронси  дар  Душанбе баргузоргардида  дар  бобати  ба  даст  овардани  ҳадафу  вазифаҳои  Даҳсолаи  байналхалқии  амалиёти  «Об  барои  зиндагӣ»  иқдоми   мусбати  навбатӣ  хоҳад  гашт. Инчунин   дар  конфронс  Президенти  Ҷумҳурии  Исломии  Эрон,  мӯҳтарам  Маҳмуд  Аҳмадинажод  сухан  кард.  Дар  конфронс  номаи табрикии  Президенти  Фаронса,  мӯҳтарам Николя  Саркози  низ  қироат  карда шуд.  Суханронии  сарони  мӯҳтарами  давлатҳо  ва  паёми  Муншии  умумии  СММ  мазмуну  мӯҳтавои  мавзӯъҳои  дар  конфронс  муҳокимашударо  ғанитар  гардониданд.   Ба  иштирокчиёни  конфронс  бештар  аз  50  маърӯза  пешниҳод  карда  шуд.  Дар  онҳо  қариб  ҳамаи  ҷанбаҳои  проблемаҳои об  инъикос  ёфтанд. Баъдан  дар  ҷараёни  муҳокимарониҳо  тамоми  проблемаҳои   миллию  минтақавӣ  ва  умумибашарӣ   мавриди  баррасӣ  қарор  дода шуданд. Баъзе  муассисаҳои  СММ,   инчунин   Кумитаи  иҷроияи  Бунёди  байналхалқии  наҷоти  Арал  ва  Вазорати  энергетика  ва  саноати Тоҷикистон  дар  ҷараёни  конфронс   дар  мавзӯъҳои  идораи  муштараки   захираҳои об,  идора  ва  истифодаи  маҷрои  дарёҳо,  проблемаҳои  ҳавзаи  Баҳри  Арал,   истихроҷ  ва  истифодаи  захираҳои  гидроэнергетикӣ  бо  мақсади  рушд  ва  ҳалли  проблемаҳои  обу  энергетика маҳфилҳои  алоҳида  ташкил  намуданд. Яке  аз  рӯйдодҳои  муҳимтарини  конфронс   намоишгоҳи  байналхалқии  «Об  барои  зиндагӣ»   буд.  Дар  он экспонатҳои  бештар  аз  30  ташкилоти  байналхалқию  минтақавӣ  ва  миллӣ  намоиш  дода шуд.  Намоишгоҳ  мавҷудияти   имкониятҳои  бузургро  нишон  дод, ки  онҳоро  минбаъд  барои  ҳалли  проблемаҳои  муҳимтарини  об истифода  бурдан  зарур  аст.  Намоишгоҳи   расму  суратҳои  бачагони  Тоҷикистон  ба  иштирокчиёни  конфронс  таассуроти  калон  бахшид. Дар  намоишгоҳ  проблемаҳои об  аз  диди  бачагон  тасвир  карда шуданд.  Ҳаминаш ҳайратовар  мебошад, ки  фарзандони  мо  аҳамияти  проблемаҳои  обро  ба таври  амиқ  дарк  намуда,  ба  воситаи   расму  суратҳои  худ   калонсолонро  водор  месозанд, ки барои  ҳалли  проблемаҳои  мавҷуда  якҷоя  кӯшиш  ба  харҷ  диҳанд.  Дар  фарҷоми  конфронс  Эъломияи  Душанбе  қабул  гардид.  Дар  он  масъалаҳои  муҳимтарини   мубоҳисаҳои  дар  ҷараёни  конфронс  бамиёнгузошташуда,  тавсияҳо ва  хулосаҳо  инъикос  ёфтаанд.  Ҳуҷҷати  мазкур  аз  ҷумла  даъват  мекунад, ки  ҳамаи  ҷонибҳои  манфиатдор   дар  бобати  ҳамкорӣ дар ҳалли  масъалаҳои  марбут ба  об  зимни  тартиб додани  нақшаҳои  миллӣ  ва  барномаҳои  рушд  масъулияти   шахсонеро бештар  созанд, ки дар  ин  масъала  қарор  қабул  мекунанд.  Дар  он ҷалби  бештари  занон  ба  ҳалли  проблемаҳои об,  афзунтар  гардонидани  сармоягузорӣ  ва тавсиаи  ҳамкорӣ, аз ҷумла  вусъати  дипломатия  дар  соҳаи  идораю  истифодаи  об  таъкид  карда  мешавад. Эъломияи  Душанбе   ҳамаи  давлатҳоро  даъват  мекунад, ки    дар  давоми  нимаи  дуюми  даҳсола имконияти   ташкили   кумитаҳои   миллӣ  ва  намояндагони  масъули   мамлакатҳояшонро   барои  мусоидат   ба  амалӣ  сохтани тадбирҳои  марбут ба  Даҳсолаи  байналхалқии  амалиёти  «Об  барои  зиндагӣ»   баррасӣ  намуда,  сиёсати  худро  дар  масъалаҳои   марбут ба  об  муайян  намуда,   барои  амалӣ  сохтани он   маблағи  зарурӣ  ҷудо  карда,  захираҳои оби  минтақаро   дастаҷамъона  ва  якҷоя  идора  карда,  ба  проблемаҳои  таъмини  аҳолӣ  бо  оби  тозаи  безарар  бештар  таваҷҷӯҳ  зоҳир  намуда,  барои  беҳтар  сохтани  шароити   санитарӣ ва тағйироти  дорои  аҳамияти  умумибашарӣ,  аз  ҷумла тағйир  ёфтани  иқлим  тадбирҳои  иловагӣ  андешида,  низоми  таҳқиқи  вазъияту  ҳолати  пиряхҳо  ва  захираҳои  обро  такмил  дода,  барои  ҳалли  проблемаҳои рӯзафзуни  об  тадбирҳои  мушаххасро  амалӣ  созанд. Созмонҳои байналхалқӣ  ва  молиявӣ,  инчунин  мамлакатҳои  сарпараст  даъват  карда  мешаванд, ки   дар  ин  самт  мамлакатҳоро   дастгирӣ  карда,  ҳаҷми  кӯмакро  ба  мамлакатҳои  қашшоқ  ва  рӯ  ба  инкишоф  бештар  созанд. Ҳукумати  Тоҷикистон Эъломияи  Душанберо  ба  муҳокимаи  иҷлосияи  65 – уми  Маҷмаи  кулли  СММ  пешниҳод   хоҳад кард. Натиҷаҳои  конфронсро  ҷамъбаст  намуда,   гуфтан  мумкин  аст, ки  он  аз  бисёр  ҷиҳат  ба  туфайли  кӯшишҳои  якҷоя  ва  ҳамоҳанги  ҳамаи  иштирокчиёни он  бомуваффақият  анҷом  ёфт  ва  натиҷаҳои  дилхоҳ  дод.  Ба  ин  аз  бисёр  ҷиҳат  ҳадафи  неку  хайрхоҳонаи   худи  Даҳсолаи  байналхалқии  амалиёти  «Об  барои  зиндагӣ»   мусоидат намуд.