МАКТАБҲОИ НАВ БА ИСТИФОДА ДОДА МЕШАВАНД

Хоруғ,  18 июн. (АМИТ «Ховар», Л.Додо ). —  Дар  шаҳру  ноҳияҳои  Вилояти  Мухтори Кӯҳистони  Бадахшон  сохтмони  биноҳои  идона  ба  охир  мерасад. Ба  муносибати   ҷашни Ваҳдати  миллӣ,  ки   имсол дар  Хоруғ  таҷлил  карда  мешавад,  якчанд  мактаби  нав   сохта  хоҳад  шуд.  Яке  аз онҳо  бинои   мактаби  миёнаи  рақами  8 – уми  ҷамоати  деҳаи Вранги  ноҳияи  Ишкошим  мебошад.  Муҳандиси  сохтмони  мактаб  Амонулло  Раҳимов   ба  мухбири  АМИТ «Ховар»  гуфт, ки   дар  мактаби  мазкур  корҳои охирин   иҷро  карда  мешаванд.  Бинои  мактаб   дар  арафаи  ҷашни  Ваҳдати  миллӣ  ба  истифода  дода  хоҳад  шуд. Бинои  мактабро   коргарону  мутахассисони  Ҷамъияти  саҳҳомии  «Ганҷи  шоҳвор»   сохтанд.  Соли  2009  дар  саросари  вилоят  20  мактаби  нав  ба  истифода дода шуд. То  охири  соли  равон  низ  ҳамин  қадам  мактаби  нав  ба  истифода дода  мешавад. Мактаби   миёнаи   деҳаи  Тоғмаи ноҳияи  Дарвоз  низ   аз  ҷумлаи   биноҳои  идона  мебошад. Директори  мактаб  Маҳмадбек  Сиддиқов  зикр  намуд, ки  мактаби  мазкур   солҳои  60  — уми  асри гузашта  сохта шуда,  ягон  маротиба тармим  карда  нашуда буд. Вазорати  маорифи  ҷумҳурӣ  тирамоҳи  соли гузашта  барои  сохтмони   бинои  нави  мактаби  мазкур   маблағи  зарурӣ  ҷудо  кард. Мактабро   коргарони  ширкати  сохтмонии  «Ғайрат»  бунёд  намуданд. Мактаби  мазкур  низ  дар  арафаи   ҷашни  Ваҳдат  ба  истифода дода  мешавад.