МЕҲМОНОН АЗ ИНШООТИ МУҲИМИ СТРАТЕГИИ ТОҶИКИСТОН БОЗДИД МЕНАМОЯНД

Душанбе, 9 июн.(АМИТ “Ховар», Марзия Саидова).-10 июн иштирокдорони конфронси байналмилалии сатҳи баланд  оид ба баррасии фарогири миёнамуддати рафти татбиқи Даҳсолаи байналмилалии «Об барои ҳаёт» 2005 -2015, ки имрӯзҳо дар Душанбе идома дорад,  аз Нерӯгоҳи барқи обии Норак, воқеъ дар 70 километрии қисмати ҷанубу шарқи  Душанбе дидан менамоянд. Зимни боздиди иштирокдорони конфронс аз нерӯгоҳи Норак баргузории семинари кӯтоҳмуддат дар мавзӯи дурнамои рушди комплекси обию энергетикии кишварҳои Осиёи Марказӣ дар назар аст. Бояд зикр кард, лоиҳаи НБО Норак соли 1950 таҳия шуда, сохтмонаш соли 1961 шурӯъ гардид. Соли 1979 агрегати охирини  он ба истифода дода шуд. Иқтидори НБО Норак  3000 МВт буда, баландии обанбораш 300 метр ва дарозиаш 70 километрро ташкил медиҳад.