МУЛОҚОТИ ПРЕЗИДЕНТИ АРМАНИСТОН БО ҲАЙАТҲОИ ПАРЛУМОНИИ МАМЛАКАТҲОИ СААД

Душанбе,  1 июн. (АМИТ «Ховар»). —  Президенти  Ҷумҳурии  Арманистон Серж Саргисян  31  май  бо  роҳбарони  ҳайатҳои  парлумонии  мамлакатҳои  аъзои  Созмони  аҳдномаи  амнияти  дастаҷамъӣ  мулоқот  кард, ки  барои  иштирок  дар  маҷлиси  сайёри  Ассамблеяи  парлумонии   созмон  ба  Ереван  омадаанд. Президенти  Арманистон  аҳамияти  гузаронидани  маҷлиси  Шӯрои  парлумонии  СААД – ро  зикр намуда,   таъкид  кард, ки  ягон  мамлакати  ҷаҳон  ба  муқобили  зуҳуроти  номатлуби   замони  ҳозира  танҳо бо  қувваи  худ  мубориза  бурда  наметавонад. Мухбири  АМИТ «Ховар»  хабар  медиҳад, ки   маҷлиси  сайёри  Ассамблеяи  парлумонии  СААД  бори  аввал  дар   пойтахти  Арманистон  гузаронида  мешавад. Президенти  Арманистон  изҳори  боварӣ  намуд,  ки  қарорҳои  маҷлис ба  самаранокии  фаъолияти  созмон  ва  равнақу  ривоҷи  ҳамкории  мамлакатҳои  аъзои  он  мусоидат   хоҳад  кард. Иштирокчиёни  маҷлиси  сайёр  31  май  таҳти роҳбарии  раиси  Думаи  давлатии Русия  Борис  Гризлов  Маҷмааи  ёдгории   хотираи   қурбониёни  табъизи  нажодии   арманҳоро  зиёрат  карданд. Дар  маҷлис  15  масъалаи   марбут ба  тадбирҳои  муштараки   амалӣ  сохтани  созишномаи  таъмини   амният  дар қитъаи  Аврупо,  вазъи  имрӯзаи  ҳарбию  сиёсии   мамлакатҳои  аъзои  созмон,  истифодаи  манбаъҳои  иловагии   қувваи барқ дар  ин  мамлакатҳо,  фаъолияти  қонунбарорӣ  ва  ғайра  баррасӣ  карда  шуданд. Дар  маҷлиси  мазкур  аз  Тоҷикистон  муовини  раиси  Маҷлиси   намояндагон   Назира  Ғаффорова  ва  муовини  раиси  Кумитаи   масъалаҳои  байналхалқии  Маҷлиси  намояндагон   Амирхон  Сафаров  иштирок  доранд. Маҷлиси  ояндаи   Шӯрои  парлумонии  СААД   моҳи  октябр  дар  Санкт – Петербург  баргузор  мегардад.