ОҒОЗИ МУСОБИҚОТИ ҚАҲРАМОНИИ ФУТБОЛИ ҶАҲОН

Душанбе,  11 июн. (АМИТ «Ховар», Пайрав  Назаров). —  Имрӯз  дар Ҷумҳурии  Африқои  Ҷанубӣ  мусобиқоти  19 – уми  қаҳрамонии  футболи  ҷаҳон  кушода  мешавад.  Мусобиқоти  мазкур  бори аввал  дар ин давлати  Африқо  баргузор  мегардад.  Ҷумҳурии  Африқои  Ҷанубӣ  ҳуқуқи  гузаронидани  мусобиқоти  қаҳрамонии  футболи  ҷаҳонро  соли  2004 ба  даст  оварда буд.  Ин  мамлакат  барои ташкили  мусобиқот қариб 4,5  миллиард  доллари  ИМА  сарф  намуд. Мухбири  АМИТ «Ховар»  хабар  медиҳад, ки  то  имрӯз  барои тамошои  қувваозмоиҳо  3  миллион  чипта  фурӯхта  шуд.  Интизор  меравад, ки  ҷараёни  мусобиқотро  300  ҳазор   сайёҳи  хориҷӣ  ва  роҳбарони  24  давлати  ҷаҳон  тамошо  мекунанд. Қувваозмоиҳо  дар  10  варзишгоҳ  баргузор  мегарданд. Аз  ин  ҷумла  5  варзишгоҳ  махсус барои   мусобиқоти  мазкур  сохта  шуданд. Дар  мусобиқот  дастаҳои  мунтахаби  32  мамлакат ширкат  меварзанд.  Дар  мусобиқоти  имсола  дастаи  мунтахаби Русия иштирок  надорад.  Дастаҳои  футболи  иштирокчии  мусобиқот  ба  8  гурӯҳ  тақсим  карда шуданд. Қувваозмоии  хотимавии он  11  июл   гузаронида  мешавад.