ПРОФЕССОРИ ТОҶИК БА УЗВИЯТИ «ГУРӮҲИ ШЕЪРУ АДАБИ ЭКО» ПАЗИРУФТА ШУД

Душанбе. 11 июн.(АМИТ «Ховар», Марзия Саидова).-Донишманди тоҷик, устоди Донишгоҳи Давлатии омӯзгории ба номи Садриддин Айнӣ,  Мирзо Аҳмадзода ба узвияти «Гурӯҳи шеъру адаби Муассисаи фарҳангии ЭКО» пазируфта шуд. Гурӯҳи мазкур аввалҳои майи соли равон созмон дода шуда, Раисаш донишманди шинохтаи Эрон доктор Маҳдии Муҳаққиқ аст. Инчунин, шахсиятҳои фарҳангию адабии Эрон  доктор Алии Равоқӣ ва доктор Озар ба ин гурӯҳ шомил  мебошанд.  «Гурӯҳи шеъру адаби  Муассисаи фарҳангии ЭКО» ниҳоди илмию фарҳангиест,  ки бо маслиҳату машваратҳои судмандаш дар густариши фарҳанги кишварҳои узви ЭКО нақши муассир мегузорад. Дар назар аст, ки дар оянда шахсиятҳои илмию адабии кишварҳои дигари аъзои ин созмон ба узвияти ин гурӯҳ пазируфта хоҳанд шуд.