ЯКСОЛАГИИ «ДОНИШКАДАИ МОЛИЯИ ТОҶИКИСТОН»
Душанбе, 14 июн. (АМИТ «Ховар», Лаззат Диловарзод).- Бо Қарори Ҳукумати Ҷумҳурии Тоҷикистон аз 18 –уми июни соли 2009 дар заминаи Коллеҷи молиявӣ- иқтисодии шаҳри Душанбе, ки кӯҳнатарин муассисаи таълимии миёнаи касбӣ мебошад, Муассисаи давлатии таълимии «Донишкадаи молияи Тоҷикистон» таъсис ёфт. Муассиси таълимгоҳи мазкур Вазорати молияи ҶТ мебошад. Вазорати молия ва раёсати Донишкадаи молияи Тоҷикистон тасмим гирифтанд, ки дар оянда ин таълимгоҳро ба Маркази ҷумҳуриявии таълимию илмии соҳаи молияшиносӣ табдил диҳанд. Айни замон Донишкада бо Академяи молияи назди Ҳукумати Федератсияи Русия, сохторҳои байналмилалии молиявӣ ва таълимгоҳҳои бонуфузтарини ҷаҳонӣ робитаҳои мутақобиларо ба роҳ монда, аз рӯи 10 равияву тахассуси соҳаи молияву иқтисодиёт мутахассис тайёр мекунад.