«ҶОМИ ШАҲРДОРӢ» СОҲИБАШРО ПАЙДО КАРД

Душанбе, 9 июл.(АМИТ «Ховар», Марзия Саидова).-Дастаи футболбозони Раёсати молияи Вазорати молияи ҷумҳурӣ дар  мусобиқаи футболи хурд байни кормандони Мақомоти иҷроияи маҳаллии ҳокимияти давлатӣ дар шаҳри Душанбе ва дигар сохторҳои ҷумҳуриявӣ ғолиб баромада,  соҳиби «Ҷоми шаҳрдорӣ» гардид. Мусобиқаи мазкур бо ташаббуси Раёсати ҷавонон, варзиш ва сайёҳии шаҳри Душанбе дар варзишгоҳи «Спартак» гузаронида шуда, дар он 24 даста дар чор гурӯҳ  бо ҳам қувва озмуданд. Зинаи дуюми мусобиқаро  дастаи Агентии назорати давлатии молиявӣ ва  мубориза бо коррупсия оид ба шаҳри Душанбе  ишғол намуда, КВД «Обу корези Душанбе» сазовори ҷойи сеюми мусобиқа гардид. Ҷараёни бозиҳои дастаҳоро доварони ботаҷрибаи мактабҳои варзишии пойтахт назора карданд. Ба ғолибони зинаҳои дуюм ва сеюми мусобиқа ва беҳтарин футболбозон тӯҳфаҳои хотиравӣ тақдим карда шуд. Мавриди зикр аст, ки мусобиқаи  футболи  хурд бо мақсади ҷалби ҳар чӣ бештари шаҳрвандон, афзун гардонидани таваҷҷӯҳи роҳбарони вазорату идораҳо,  сохтору муассисаҳои давлатӣ ба варзиш мебошад.