БАРГУЗОРИИ 283 ЯРМАРКАИ ҶОЙҲОИ КОРИИ ХОЛӢ

Душанбе, 22 июл. (АМИТ «Ховар», Лаззат Диловарзод).- Бино ба гуфти вазири меҳнат ва ҳифзи иҷтимоии аҳолӣ Маҳмадамин Маҳмадаминов, дар давоми шаш моҳи соли ҷорӣ дар марказҳои шаҳру навоҳии ҷумҳурӣ 283 ярмаркаи ҷойҳои кории  холӣ гузаронида шудааст, ки 2 ҳазор нафар шаҳрвандон соҳиби ҷойи кори доимӣ шуданд. Аз ин ҳисоб  21 фоизашонро занони корҷӯ ташкил додаанд. Тибқи маълумоти ҳамин манбаъ, бо вуҷуди аз ҷониби ташкилоту корхонаҳои кордиҳанда пешниҳод шудани ҷойҳои зиёди кории  холӣ, аз сабаби камии маош,  на ҳама барои худ ҷойи кори доимӣ интихоб карданд. Ин дар ҳолест, ки ҳамасола аз Ҷумҳурии Тоҷикистон беш аз 750 – 800 ҳазор нафар корҷӯёни мавсимӣ барои пайдо кардани кор ба хориҷи кишвар сафар мекунанд. Ин раванди муҳоҷират барои ҳамаи шаҳрвандони   ИДМ хос аст, ки Ҷумҳурии Тоҷикистон аз ин  истисно нест. Тибқи маълумоти оморӣ, дар давоми сол беш аз 18 – 20 млн. шаҳрвандони ИДМ барои дарёфти  кори маоши баланд дошта,  чун муҳоҷирони меҳнатии мавсимӣ   ба давлатҳои хориҷ сафар  мекунанд.