CОҲИЛИ РӮДХОНАҲОИ ДУШАНБЕ ДАР МУВОЗИНАТИ ЯГОН ИДОРА НАБУДААСТ

Душанбе, 19 июл.(АМИТ «Ховар», Марзия Саидова).-Дар давоми 5 соли охир барои мустаҳкам кардани соҳили дарёҳое, ки аз ҳудуди Душанбе мегузаранд,  шаҳрдории Душанбе 21 миллион сомонӣ  сарф кардааст. Ин матлабро Раиси  шаҳри Душанбе Маҳмадсаид Убайдуллоев  дар ҷараёни  баргузории ҷаласаи ҷамъбасти фаъолияти  нимсолаи Мақомоти иҷроияи маҳаллии ҳокимияти давлатӣ дар шаҳри Душанбе баён дошт. Зикр шуд, ки тӯли соҳили дарёҳое, ки аз пойтахт мегузаранд,  беш аз 60 километр буда, баъзе нуқтаҳояш дар фасли баҳор ҳангоми боришоти аз меъёр зиёд хатарафзо аст. Дар робита ба ин масъала муовини Сарвазири мамлакат Асадулло Ғуломов, ки дар ҷаласа ҳузур дошт, гуфт ки шаҳрдории Душанбе нисбат ба ин масъала, бо мактуб бояд ба Ҳукумати ҷумҳурӣ муроҷиат намоянд, то дар оянда рӯдхонаҳои Душанбе ба тавозуни ягон вазорат ва ё идораи марбута даромада, соҳилҳои он мустаҳкам карда шаванд.