ДАР ДУШАНБЕ СПКСК МУАРРИФӢ ШУД
Душанбе, 1 июл.(АМИТ «Ховар», Марзия Саидова).-1 июл дар Вазорати рушди иқтисод ва савдои ҷумҳурӣ Стратегияи паст кардани сатҳи камбизоатӣ (СПКСК) барои давраи солҳои 2010-2012 ва лоиҳаи нақшаи тадбирҳои аввалиндараҷаи он муаррифӣ гардид. Дар муаррифии Стратегияи мазкур намояндагони Вазорату идораҳои мамлакат, созмонҳои байналмилалӣ ва институтҳои молиявии муқими Тоҷикистон иштирок карданд. Зимни муаррифии ин санади муҳим зикр шуд, ки сиёсати Ҳукумати Ҷумҳурии Тоҷикистон барои беҳдошти вазъи иҷтимоии аҳолӣ равона гардида, ҷиҳати ноил шудан ба се ҳадафи стратегии Ҳукумати Ҷумҳурии Тоҷикистон – ба даст овардани истиқлолияти энергетикӣ, раҳоӣ аз бунбасти коммуникатсионӣ ва таъмини амнияти озуқавории мамлакат равона мегардад. Афзалиятҳои асосии Стратегияи Миллии Рушд ва Стратегияи паст кардани сатҳи камбизоатӣ ба ислоҳоти идоракунии давлатӣ, рушди бахши хусусӣ ва ҷалби инвеститсияҳо, рушди нерӯи инсонӣ дар ҷомеаи Тоҷикистон нигаронида шудааст. Дар раванди таҳияи Стратегияи паст кардани сатҳи камбизоатӣ барои солҳои 2010-2012 гурӯҳи кории ҳамоҳангсоз ва гурӯҳи кории коршиносони маҳаллӣ таъсис дода шуд. Дар назар аст, ки бо татбиқи Стратегияи мазкур сатҳи камбизоатӣ дар кишвар то 41, 4 % коҳиш хоҳад ёфт. Бо мақсади таъмини мониторинг ва арзёбии ҷараёни татбиқи тадбирҳои Стратегияи Ҳукумати Ҷумҳурии Тоҷикистон Вазорати рушди иқтисод ва савдои ҷумҳурӣ мақоми масъул муайян шудааст. Аз ин рӯ, мониторинги татбиқи Стратегияи паст кардани сатҳи камбизоатӣ дар ҷумҳурӣ аз ҷониби Вазорати рушди иқтисод ва савдои мамлакат амалӣ гардонида мешавад. Мавриди зикр аст, ки Стратегияи мазкур дар ҷаласаи Шӯрои Миллии Рушди назди Президенти мамлакат баррасӣ шуда, онро моҳи феврали соли 2010 палатаи поёнии парлумони Тоҷикистон тасдиқ намуда буд.








Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд






