ХАВФИ ҲУҶУМ БОҚӢ МОНДААСТ

Душанбе, 19 июл. (АМИТ «Ховар», Лаззат Диловарзод).- Бино ба иттилои Корхонаи ҷумҳуриявии воҳиди давлатии «Мубориза бар зидди малах» то 14 – уми июли соли ҷорӣ паҳншавии малах дар ҷумҳурӣ дар масоҳати 101 ҳазору 300 гектар ба қайд гирифта шудааст, ки аз он ҳашароти  84 ҳазору 433 гектарашро бо роҳи коркарди кимиёвӣ нобуд сохтанд. Айни замон, дар маъракаи мубориза бар зидди малах ва дигар ҳашароти зараррасон аз 764 қувваи корӣ, 27 адад трактори дорупош    ва 518 адад дорупошакҳои дастӣ истифода карда мешавад. Майдони паҳншудаи  малах дар вилояти Хатлон нисбатан зиёд аст. Малах дар ин вилоят дар масоҳати 47 ҳазору 900 гектар замини чарогоҳ ва зироатҳои ғалладонагӣ паҳн шудааст. Сабаби дар майдони зиёд паҳн шудани  малахро дар ин вилояти ҷумҳурӣ мутахассисон дар нокифоя истифода кардани  заҳрхимикатҳо ба  муқобили ҳашароти зараррасон  дар соли сипаришуда медонанд. Бо вуҷуди  дар масоҳати 45 ҳазору 950 гектар  бо роҳи кимиёвӣ нобуд сохтани малах   ҳанӯз хавфи ҳуҷуми он ба майдони пахтаю ғаллазори ин вилоят боқӣ мондааст.