МАРҲАБО БА БАЗМИ ШЕЪРУ СУРУД ВА ҲУНАРҲОИ МАРДУМӢ!

Душанбе, 12 июл.(АМИТ «Ховар», Марзия Саидова).- Ба ифтихори 20 –умин солгарди Ҷашни истиқлолияти давлатии Ҷумҳурии Тоҷикистон 18 июл дар Боғи ботаникии шаҳри Душанбе бо ташаббуси Мақомоти иҷроияи  маҳаллии ҳокимияти давлатии ноҳияи Ҳисор барномаи консертӣ бо иштироки ҳунармандон ва дастаҳои ҳунарии  шӯъбаи фарҳанги ноҳия баргузор мегардад. Назар ба иттилоъи  мудири шӯъбаи фарҳанги ноҳияи Ҳисор Нуралӣ Мирзоалиев, инчунин дар ин рӯз намоиши ҳунарҳои мардумӣ ва анъанаҳои миллӣ ташкил карда шуда, бо мақсади фаровон гардонидани дастархони сокинони пойтахт навъҳои гуногуни маҳсулоти кишоварзӣ, ки дастранҷи деҳқонони ноҳия мебошанд,  ба намоиш ва фурӯш гузошта мешаванд. Дар мавриди рушди фаъолияти муассисаҳои фарҳангии ноҳия ва баланд бардоштани сатҳи маърифатнокию фарҳанги аҳолӣ,  Нуралӣ Мирзоалиев афзуд, ки маҳз бо иқдомот ва  дастгирии Раиси ноҳияи Ҳисор Баҳриддин Солеҳов  ва соҳибкорони ноҳия Боғи марказии фарҳангу фароғатии ноҳия ободтар гардида, дар он воситаҳои дилхушкунанда, аз ҷумла, чархофалаку бодпаракҳо насб карда шуданд. Алҳол,  дар назди шӯъбаи фарҳанги ноҳияи Ҳисор Филармонияи халқии ба номи Тоҷиддин Муҳиддинов, мактаби ҳунарии ба номи Саид Ҳамроев, Театри халқӣ ва 11 марказҳои фарҳангӣ, ки  дар ҷамоати деҳоти ноҳия ташкил карда шудаанд, фаъолият менамоянд.