РУШДИ САЙЁҲАТИ ФАРҲАНГӢ ДАР ТОҶИКИСТОН

Душанбе, 2 июл. (АМИТ «Ховар», Лутфия Эшонқулова).-6 июл дар маҷлисгоҳи Вазорати фарҳанги Ҷумҳурии Тоҷикистон  семинари ҷумҳуриявии «Рушди сайёҳати фарҳангӣ дар Тоҷикистон», бахшида ба эълон гардидани шаҳри Душанбе ҳамчун пойтахти фарҳанги исломӣ дар соли 2010 баргузор мегардад. Семинар бо ташаббуси Вазорати фарҳанг ва Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон доир карда мешавад. Тавре ба АМИТ «Ховар» аз маркази матбуоти Вазорати фарҳанг хабар доданд,  семинар аз ду ҷаласа иборат буда, онро Вазири фарҳанг Мирзошоҳрух Асрорӣ ва раиси Кумитаи ҷавонон, варзиш ва сайёҳӣ Маликшо Неъматов ифтитоҳ хоҳанд бахшид.  Дар ҷаласаҳо ҳашт мавзўъ, аз ҷумла мавзўҳои «Роҳи бузурги абрешим ҳамчун падидаи пайванди тамаддунҳо ва фарҳангҳо. Гузашта ва имрўза», «Нақши мақоми давлатии соҳаи туризм дар инкишофи сайёҳати фарҳангӣ», «Нақши Шўрои рушди туризми водии Зарафшон дар истеҳсоли маҳсулоти мухталифи туристӣ дар заминаи мероси фарҳангии минтақа» аз ҷониби иштирокчиён баррасӣ мешаванд.