САМАРАИ ХУБИ ҲАМКОРӢ

Душанбе,  1 июл. (АМИТ «Ховар»,  Дилшода  Ҷонмардова). —  Президенти  Ҷумҳурии  Тоҷикистон  Эмомалӣ  Раҳмон  қабл  аз  чошти  имрӯз  бо  роҳбари Хадамоти федералии   назорати  маводи  нашъадори  Федератсияи  Русия  Виктор  Иванов  мулоқот  кард. В.Иванов   баъди  анҷоми мулоқоташ  бо  Сардори  давлат   зимни  сӯҳбати  мухтасар  бо  хабарнигорон  дар  бораи  натиҷаҳои он  сухан  ронд.   Вай  зикр  намуд, ки ҳамроҳи  Президент  масъалаҳои  ҳамкории  мақомоти  дахлдори  Тоҷикистону  Русияро  дар  мубориза ба  муқобили  истеҳсоли  маводи  нашъадор  ва   хариду  фурӯши  ғайриқонунии  он  муҳокима  кардааст.  Қайд  карда шуд, ки  ҳар  ду  ҷониб  вазъи  имрӯзаи  истеҳсоли  маводи  нашъадорро  дар  Афғонистон  ва  роҳу  усулҳои  пешгирии   паҳн  гардидани онро  аз  ин  мамлакат  ба  минтақаи  Осиёи  Марказӣ  ва  мамлакатҳои  дигар  таҳлил  намуданд. Бояд   гуфт, ки  мавқеи  ҳар  ду  ҷониб   дар  ин  масъала  комилан   мувофиқат  мекунад. В.Иванов   ба   сатҳи  муносибатҳо ва ҳамкории  мақомоти  муҳофизи қонуну  тартиботи  Русия  ва  Тоҷикистон  баҳои  баланд  дод. Ман  ҳамчун  роҳбари  Хадамоти  Федералии  назорати   маводи  нашъадори  Русия  аз  дастгирӣ ва  ҳамкории  роҳбарон ва  кормандони мақомоти  дахлдори  Тоҷикистон  комилан  қаноатманд  гардидам.  Мо  минбаъд  ҳам   дар  мубориза ба  муқобили   ин  зуҳуроти  бадӣ  бештар  аз  пештар  ҳамкорӣ  хоҳем  кард,  гуфт  В.Иванов.