ТАСАРРУФИ МАБЛАҒҲОИ БУҶАВӢ ОШКОР ГАРДИД

Душанбе, 20 июл. (АМИТ «Ховар», Лаззат Диловарзод).- Бино ба иттилои маркази матбуотии прокуратураи вилояти Суғд, дар натиҷаи санҷишҳои прокурорӣ дар макотиби таълимоти умумӣ ва олии ин вилоят тасарруфи маблағҳои буҷавӣ ошкор карда шуданд. Прокуратураи шаҳри Хуҷанд фаъолияти дусолаи сармуҳосиби Донишгоҳи давлатии шаҳри Хуҷандро мавриди санҷиш қарор дод. Дар натиҷаи санҷиш  маълум гардид, ки сармуҳосиби донишгоҳи мазкур Б.З бо роҳи сӯистифода аз боварӣ дар давоми ду соли охир аз хазинаи донишгоҳ ба тариқи ғайриқонунӣ маблағҳои  буҷетӣ ва маблағҳои пардохткардаи донишҷӯёнро дар ҳаҷми 1млн. 900 ҳазор сомонӣ тасарруф намудааст. Айни замон сармуҳосиб дар боздошти пешакӣ нигоҳ дошта шуда, нисбати амали содиркардаи ӯ бо моддаҳои  245 қ.4 (азонихудкунӣ ё исрофкорӣ), 247қ.4(қаллобӣ), 323 (сохтакории хизматӣ) –и КҶ ҶТ парвандаи ҷиноятӣ оғоз карда шуда тафтиш  бурда мешавад.