ТОЛОРИ ВАРЗИШӢ БАРОИ МАКТАБ-ПАРВАРИШГОҲИ ИСФАРА

Душанбе, 19  июл. (АМИТ «Ховар», Ибодат Давлатова). – Дар Соли маориф ва фарҳанги техникӣ дар шаҳри Исфара барои хонандагони мактаб-парваришгоҳи махсуси кӯдакони қувваи босираашон суст толори нави варзишӣ сохта мешавад. Тавре аз Хадамоти матбуоти Раиси вилояти Суғд ба АМИТ «Ховар» иттилоъ доданд, бо ин мақсад қарори Раиси вилояти Суғд Қоҳир Расулзода «Оид ба ҷудо намудани маблағ»  баромад, ва мутобиқ ба он аз ҳисоби  буҷети вилоятӣ 64 ҳазору 961 сомонӣ маблағ ҷудо гардид. Ҳамчунин тибқи қарори мазкур,  барои харидани  100 адад рохҳат ба лагери «Сомониён»-и мавзеи Деҳмойи ноҳияи Ҷаббор Расулов барои кӯдакону наврасон аз оилаҳои камбизоат аз буҷети вилоятӣ 26 ҳазор сомонӣ маблағ ҷудо шуд. Ҷудо гардидани маблағҳо барои истироҳату фароғати кӯдакону наврасон аз оилаҳои камбизоат ва дастгирии ҳамешагии мардуми ниёзманд аз ҷониби давлату Ҳукумати Ҷумҳурии Тоҷикистон ва мақомоти иҷроияи ҳокимияти давлатии вилоят, бозгӯи  татбиқи оқилонаи сиёсати иҷтимоии Ҳукумати Ҷумҳурии Тоҷикистон мебошад, қайд намуд дар охир манбаъ.