ЗАМИНИ БЕКОРХОБИДАИ МИНТАҚАИ ҚӮРҒОНТЕППА

Душанбе, 30 июл. (АМИТ «Ховар», Лаззат Диловарзод).- Соли ҷорӣ танҳо дар минтақаи Қӯрғонтеппаи вилояти Хатлон беш аз 8 ҳазор гектар замин аз гардиши кишоварзӣ берун мондааст,- иброз дошт муовини сардори Раёсати кишоварзии вилоят Одинақул Душанов. -Масъалаи истифода нашудани замини кишт,  яке аз масъалаҳои баҳсноки доғи рӯз дар  кори мушовараи Сарраёсати кишоварзии минтақа мавриди баррасӣ қарор гирифт,- гуфт ба мухбири АМИТ «Ховар» О. Душанов. Бо вуҷуди муроҷиати  Президенти кишвар оид ба гирифтани ду- се ҳосил аз заминҳои обӣ, маълум гардид, ки дар минтақаи Қӯрғонтеппа нафақат барои гирифтани ҳосили дуюму сеюм, балки дар аксари ноҳияҳои минтақа барои гирфтани ҳосили якум ҳам коре карда нашудааст. Ба иттилои ҳамин манбаъ, дар нимсолаи якуми соли 2010 дар ноҳияҳои Панҷ, Қумсангир, Ҷиликӯл, Қубодиён, Носири Хусрав, Ҷалолиддини Румӣ, Шаҳритус,   ва Абдураҳмони Ҷомӣ 8 ҳазору 233 га замин умуман кишт нашудааст.