БАРҚИЯИ Э. РАҲМОН БА Ҳ. КАРЗАЙ

19 августи соли 2010 Президенти Ҷумҳурии Тоҷикистон Эмомалӣ Раҳмон  ба Раиси ҷумҳури Ҷумҳурии Исломии Афғонистон Ҳомид Карзай барқияи табрикӣ ирсол намуд, ки дар он аз ҷумла омадааст: Ҷалолатмаоб, Бо камоли эҳтирому қаноатмандии бузург Шумо, ҷалолатмаоб ва тамоми мардуми кишвари бародару ҳамкешро ба муносибати Иди миллии он – ҷашни солгарди истирдоди истиқлоли давлати Афғонистон – самимона табрик менамоям. Мо ба вазъи имрўза ва дурнамои густариши муносибатҳои мутақобилан судманди Тоҷикистону Афғонистон баҳои баланд дода, чунин меҳисобем, ки ин раванд ҷавобгўи манфиатҳои тарафайн ва суботу рушди устувори минтақа мебошад. Умед дорам, ки татбиқи амалии “раванди Кобул”, ки онро конфронси байналмилалӣ оид ба Афғонистон оғоз бахшид, кишвари дўсту ҳамсояро ба сулҳу субот, ризоияти миллӣ ва пешрафту шукуфоӣ хоҳад бурд. Мутмаин бошед, ки Тоҷикистон дар ин самт ҷиҳати мададрасонӣ аз имкониятҳои хеш дареғ нахоҳад варзид. Бо истифода аз ин фурсати муносиб, ба Шумо, ҷалолатмаоб, барору комёбӣ ва ба мардуми дўсту бародари  Афғонистон сулҳу саодат ва рўзгори хуш орзў менамоям. Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.