БАРРАСИИ ТАТБИҚИ АФЗАЛИЯТҲОИ МИЛЛИИ РУШД

Душанбе, 31 август. (АМИТ «Ховар», Бекназари Абӯбакр). — 30 августи соли равон дар шаҳри Душанбе мулоқоти кормандони масъули бахшҳои сиёсати сармоягузорӣ ва мониторинги барномаҳои миллии Вазорати рушди иқтисод ва савдои Ҷумҳурии Тоҷикистон бо коршиносон ва намояндагони Лоиҳаи «Дастгирии ҳамоҳангсозии самараноки миллии кӯмаки беруна ва пешбурди сармоягузориҳо»-и назди Кумитаи давлатии сармоягузорӣ ва идораи амволи давлатии Ҷумҳурии Тоҷикистон доир гардид. Дар мулоқот масъалаҳои татбиқи афзалиятҳои миллии рушди Ҷумҳурии Тоҷикистон дар доираи тадбирҳои Стратегияи миллии рушд ва Стратегияи паст кардани сатҳи камбизоатӣ дар Ҷумҳурии Тоҷикистон барои солҳои 2010-2012 баррасӣ гардиданд. Ҳамчунин, ҷонибҳо таъмини самараноки ҳамоҳангсозии кӯмаки берунаро мавриди баррасӣ қарор доданд. Ҷониби Вазорати рушди иқтисод ва савдо изҳор дошт, ки афзалиятҳои миллии рушди Тоҷикистон дар ҳуҷҷатҳои стратегии кишвар чун Стратегияи миллии рушд ва стретегияҳои миёнамӯҳлати паст кардани сатҳи камбизоатӣ муайян гардидаанд ва Ҳукумати Ҷумҳурии Тоҷикистон дар ин замина ислоҳоти иқтисодиро татбиқ менамояд. Аз ин рӯ, такмили заминаи ҳуқуқӣ ва беҳдошти фазои сармоягузорӣ ҷиҳати тақвияти ҷалби сармояи мустақими хориҷӣ зарур дониста шуд.