БУНЁДИ БОЗ ЯК МАРКАЗИ НАВИ САВДО

Тоҷикобод, 12 август. (АМИТ « Ховар», М. Ризвонов).- Ба наздикӣ дар ноҳияи  Тоҷикобод аз тарафи  соҳибкор, сокини ҷамоати  деҳоти «Шогадоев» Дилшод  Неъматуллоев  бинои нави сеошёнаи  замонавии  маркази савдои  «Неъматулло» сохта ба истифода дода шуд.   Биноро сохтмончиёни ҷамоати маҳал  ба маблағи 38 ҳазор  доллари амрикоӣ сохта ба истифода доданд. Дар ошёнаи якуми  бино нуқтаҳои фурӯши  молҳои ниёзи мардум  ва хӯрокворӣ,дар  ошёнаи  дуюм молҳои рӯзгор ва дар ошёнаи  сеюм  чойхонаи  миллӣ ҷойгир шудаанд. Ташкили  маркази мазкур  имкон дод, ки  15 нафар ҷавонони деҳот  бо ҷойи кори доимӣ таъмин гарданд.