ДУ ХОНАИ НАВ БАРОИ ЗАРАРДИДАГОНИ КӮЛОБ

Рашт, 26 август. (АМИТ «Ховар» М. Ризвонов).- Дар баробари  дигар ташкилоту муассисаҳои шаҳру ноҳияҳои  ҷумҳурӣ мақомоти  иҷроияи   маҳаллии ҳокимияти  давлатии ноҳияи  Рашт низ ӯҳдадор шудаанд, ки  барои  зарардидагони офати табиии  шаҳри Кӯлоб   ду хонаи истиқоматии  панҷҳуҷрадор созанд. Айни  замон сохтмони  ин хонаҳо  бо суръат  ҷараён дорад. Тавре дар сӯҳбат  бо мо масъули  ташкилоти сохтмонии ҶДММ «Сомон-7»-и  ноҳияи Рашт Минҳоҷиддин Лутфуллоев изҳор дошт,  манзилҳои нави  истиқоматӣ баъди  бунёд гардидан бо  тамоми  лавозимоти  рӯзгор  пурра ҷиҳозонида  шуда,  дар охири моҳи  сентябри соли равон    ба истифода дода мешаванд.