ЭҲЁИ СУННАТҲОИ НИЁГОН

Мурғоб, 10  август. (АМИТ  «Ховар»,Л Додо).-  Бародарони қирғиз, ки сокинони  бумии ноҳияи  Мурғоб мебошанд, таърихан усули  махсуси тайёр   кардани ғизоро доштанд. Мутобиқ ба иқлими  диёри баландкӯҳ пешгузаштагони онҳо  таомҳое тайёр мекарданд, ки  муддати дароз  таъму сифату  ғизонокии худро  нигоҳ медошту вайрон намешуд. Онҳо  метавонистанд муддати   тӯлонӣ аз як мавзеъ  ба мавзеи дигар  дунболи чорво  рафта, ин ғизоро истеъмол  намоянд ва боз суннатҳои дигари  нодир доштанд, аммо афсӯс, ки  бо мурури замон як  қисми онҳо  фаромӯш шуданд. Ҳоло дар ноҳия  ба хотири эҳёи ин суннатҳо  як созмон ташкил шудааст.  Тавре аз мақомоти  маҳаллии ҳокимияти  давлатии ноҳия  иттилоъ доданд,  ҳар сол дар маркази  ноҳия дар давоми  як рӯз намоиши « Эҳё» рӯи кор меояд. Дар он суннатҳои  фаромӯшшудаи  сокинони муқимии  ноҳия ба намоиш гузошта  мешаванд, аз ҷумла он ғизоҳое, ки  муддати тӯлонӣ  таъму  сифати худро нигоҳ медоранд.