ХАТИ НАВИ ОБ ДАР ШӮРООБОД

Шӯрообод, 17 август. (АМИТ «Ховар», Сулаймон Холов). —  Дар рӯзҳои моҳи шарифи Рамазон ва арафаи ҷашни 19-умин солгарди истиқлолияти давлатии кишвар шодию нишоти сокинони деҳи Қозии ҷамоати деҳоти Саричашмаи ноҳияи Шӯроободро ҳадду канор набуд, зеро дар натиҷаи ҷахду талошҳои пайвастаи мақомоти маҳаллӣ дар доираи татбиқи лоиҳаҳои гуногунсамти Барномаи ҷонибдории инкишофи  иҷтимоии манотиқи кӯҳистон ба ин деҳаи дурдаст  аз масофаи 3 км  хати оби нушокӣ оварда шуд. Тӯли солиёни дароз мардуми ин деҳа аз нарасидани оби ошомиданӣ танқисӣ мекашиданд ва амалӣ шудани    лоиҳаи мазкур  ин мушкили сокинони деҳаро бартараф сохт. Дар сохтмони иншооти ҷадиди обтаъминкунӣ беш аз 17 ҳазору 871 сомонӣ маблағ масраф гардидааст, ки 12 ҳазор сомонии  ин маблағҳо бо дастгирии  Иттиҳоди Аврупо, 5 ҳазору 871 сомонии он саҳми мақомоти маҳаллӣ ва сокинони деҳа    мебошад. Акнун аз ин иншоот ба 20   нуқтаи алоҳида  оби нӯшокӣ кашида шудааст, ки аз онҳо сокинони деҳ бе душворӣ истифода мебаранд.