МАКТАБҲОИ РОҒУН БО СӮЗИШВОРӢ ТАЪМИНАНД

Роғун, 25 август.(АМИТ «Ховар», Зебо Давлатова).-  Дар шаҳри Роғун  ба пешрафти  таълиму тарбияи  насли наврас дар  соли нави хониш  диққати зарурӣ медиҳанд. Тавре ба хабарнигори АМИТ «Ховар» мудири маорифи шаҳр  Табаралӣ Раҷабов гуфт,  бо мақсади таъмиру  тармими мактабҳо  аз буҷаи маҳаллӣ  491 004   сомонӣ, барои  хариди сӯзишворӣ  барои зимистонгузаронӣ  303 000   сомонӣ ва барои  хариди таҷҳизоти  наву замонавӣ  315 745  сомонӣ ҷудо гардид.  Айни замон  дар ҳамаи мактабҳо   корҳои омодагӣ,  аз қабили шишабандӣ,  таъмиру тармими  бомҳо,  биноҳои таълимию  ёрирасон, ороиши синфхонаҳо,  кабинетҳои фаннӣ  ва утоқҳои корӣ  дар арафаи  анҷомёбианд. То имрӯз аз ҷониби  роҳбарони мактабҳои  шаҳр 762,5 тонна ангишт  ва 146м. кубӣ  ҳезум барои  зимистони дарпешистода захира  шудааст. Табаралӣ Раҷабов  афзуд, ки  соли ҷорӣ дар  назди мактабҳои  таҳсилоти  ҳамагонии рақами 1 се синфхонаи  иловагӣ,  рақами 30 чор синфхонаи иловагӣ,  рақами 7 ду  синфхонаи иловагӣ  ва толори маҷлисгоҳ  сохта ба истифода дода шуд, ки  толибилмон  дар соли нави  хониш аз он  истифода мебаранд.