МАРЗИ ӮЗБЕКИСТОН БО ТОҶИКИСТОН БОЗ ШУД

Душанбе, 17 август. (АМИТ «Ховар», Фарангис Раҳимова). – Ҷумҳурии Ӯзбекистон гузаштани сарҳадро барои шаҳрвандони Тоҷикистон ба ҳудуди Ӯзбекистон иҷозат дод. Ин маҳдудкунӣ бар асари хурӯҷ кардани бемории фалаҷ дар ҳудуди Ҷумҳурии Тоҷикистон ҷорӣ шуда буд. Роҳбари департаменти иттилоотии Вазорати корҳои хориҷии ҶТ Давлат Назрӣ ба АМИТ «Ховар» хабар дод, ки 13 августи соли ҷорӣ ба нишонии ВКХ ҶТ мактуби ҷавобӣ аз Ҷумҳурии Ӯзбекистон расид. Дар он омадааст, ки «бо сабаби мӯътадил гардидани вазъи эпидемиологӣ дар Тоҷикистон ҷониби Ӯзбекистон қарор дод, ки маҳдудкунии воридшавии шаҳрвандони то синни 15 солаи Тоҷикистонро ба ҳудуди Ҷумҳурии Ӯзбекистон, ки пештар манъ намуда буд, бекор намояд. Ҳамзамон вуруди шаҳрвандони 15 солаи Ӯзбекистонро бе доштани шаҳодатномаи тиббии нишондиҳандаи эми зидди бемории фалаҷ иҷозат дод». Ёдовар мешавем, ки 13 майи соли ҷорӣ Сафорати Ӯзбекистон ба ВКХ ҶТ мактуб дар бораи маҳдудкунии муваққатии вуруди шаҳрвандони Тоҷикистон ба марзи Ӯзбекистонро супорида буд.