МУБОРИЗАИ ҶАВОНОН БАР ЗИДДИ НАШЪАМАНДӢ

      Бадахшон, 13 август. (АМИТ «Ховар», Л Додо).- Кормандони раёсати Агентии назорати маводи нашъаовари назди Президенти ҷумҳурӣ дар ВМКБ баҳри тарғиби зарари маводи нашъаовар ва бо мақсади кам гардидани теъдоди нашъамандон бо ҷавонон пайваста вохӯриву сӯҳбат доир менамоянд.      Дирӯз чунин сӯҳбат дар урдӯгоҳи «Шабдез»-и ноҳияи Роштқалъа барпо гардид. Кормандони Агентӣ иттилоъ доданд, ки дар давоми ҳафт моҳи соли ҷорӣ даҳ ҳодисаи қочоқи маводи мухаддир пешгирӣ гардида, 25 кг нашъа мусодира карда шуд.       Дар вохӯрӣ ҳамчунин зикр гардид, ки ба ин бемории марговар асосан ҷавонони сустиродаи камтарбия гирифтор мегарданд. Намояндагони раёсати Агентӣ ҷавонони солимфикрро даъват намуданд, ки дар мубориза алайҳи вабои қарн- нашъамандӣ фаъолона иштирок намоянд.