НАҶОТИ КӮҲНАВАРДОНИ УКРАИНӢ

Душанбе, 12 август. (АМИТ «Ховар», Лутфия Эшонқулова).- 11 август гурӯҳи панҷнафараи наҷотдиҳандагони Кумитаи ҳолатҳои фавқулодда ва мудофиаи шаҳрвандии ҶТ ва намояндаи Кумитаи кор бо ҷавонон, варзиш ва сайёҳии назди Ҳукумати ҶТ бо мақсади наҷот додани кӯхнавардони Украина ба Помир  парвоз намуданд. Ёдовар мешавем, ки чанд рӯз пеш Устоди варзиши Украина оид ба туризм Олег Монсари 49 сола, ки роҳбари гурӯҳи дунафара буд, аз қуллаи кӯҳи ағбаи Девлохони ҷанубӣ ба поён афтод. Худи ҳамон рӯз алоқа бо кӯҳнавардон канда шуд.   Тавре аз Кумитаи ҳолатҳои фавқулодда ва мудофиаи шаҳрвандии ҶТ ба хабарнигори АМИТ «Ховар» хабар доданд, дарҳол пас аз маълум шудани ин фоҷеа гурӯҳи наҷотдиҳанда ташкил карда шуд, вале бо сабаби аз кор баромадани чархболи ягонаи Кумита сари вақт ба ҷойи ҳодиса расида натавонистанд.  Чархболи дуюм, ки дар тобеияти Вазорати мудофиаи ҶТ аст, имрӯз пас аз дарёфти иҷозат бо гурӯҳи наҷотдиҳандагон ба ҷойи ҳодиса парвоз кард. Дар айни замон барои наҷот додани кӯҳнавардон тамоми тадбирҳои зарурӣ андешида мешаванд.