ОМОДАГИИ КИТОБХОНАИ КӮДАКОНА БА РӮЗИ КИТОБ

Душанбе, 5 август. (АМИТ «Ховар», Лутфия Эшонқулова).- Кормандони китобхонаи ҷумҳуриявии бачагонаи ба номи М. Миршакар ба гузаронидани як қатор чорабиниҳо бахшида ба Рӯзи китоб, ки аз соли 2008 инҷониб дар кишварамон баргузор мегардад, омодагӣ дида истодаанд.    Ёдовар мешавем, ки бо ташаббуси Президенти кишвар Эмомалӣ Раҳмон, 4 сентябр ҳамчун Рӯзи китоб элон гардида буд. Директори китобхонаи бачагона Қурбон Афғонов афзуд, ки дар арафаи иди Рӯзи китоб кормандони китобхона ният доранд, ки мулоқоти намояндагони аҳли илму адабро бо хонандагони фаъоли китобхона ташкил намоянд. Ҳамчунин ӯ қайд намуд, ки «мо нақша дорем мизи мудаввар дар мавзӯи «Китобхонаҳои Тоҷикистон бояд чӣ гуна бошанд?» ташкил намуда, аз тамоми китобхонаҳои бачагонаи ҷумҳурӣ мутахассисони шӯъбаи китобдориро даъват карда, оид ба вазъи имрӯза, пурранамоӣ ва нигоҳдории фонди китобҳои китобхонаи ҷумҳуриявӣ, танзими санадҳои меъёриву ҳуқуқии корҳои китобдориро  мавриди баррасӣ қарор диҳем». Дар доираи чорабиниҳо бахшида ба Рӯзи китоб намоиши калони китобҳо дар тамоми ҷумҳурӣ ташкил ва гузаронида мешавад.