ОЗМУНИ ШОГИРДОНИ МАКТАБИ КИНО-2010

        Маскав, 16 август. (АМИТ «Ховар», Ҳалима Хушқадамова). – Омодагиҳо ба сеюмин озмуни мактаби байналхалқии филмофарони давлатҳои ИДМ, Гурҷистон, Латвия, Литва ва Эстония, ки аз 24 октябр то 2 ноябр дар шаҳри Маскав баргузор мегардад, оғоз гардид. Ин бо ташаббуси конфедератсияи Иттифоқҳои филмбардорони Руссия, Бунёди байнидавлатии ҳамкориҳои гуманитарии давлатҳои узви ИДМ ва Бунёди филмофарии давлати Русия гузаронида мешавад. Дар ин бора хабарнигори махсуси АМИТ «Ховар» аз шаҳри Маскав иттилоъ дод.        Мактаби синаморо раиси конфедератсияи Иттифоқхои филмбардорон Рустам Иброҳимбеков роҳбарӣ мекунад. Дар озмун шогирдони намояндагони се соҳаи кино-коргардони филмҳои бадеӣ ва мустанад, драматургон ва мунаққидон метавонанд иштирок намоянд.        Барномаи мактаби байналмилалии филмбардорон машғулиятҳои умумӣ, машғулиятҳои мавзӯӣ таҳти роҳбарии ҳунармандони варзидаи кинои Русия, курси мухтасари таърихи кинои сермиллати Шӯравӣ, намоиши филмҳои нахустин, шиносоӣ бо намоишномаҳои нахустини шогирдони мактаби кино ва ғайраро дар бар мегирад.        Дар озмуни таҳсили мактаб талабагони синфҳои охирини шӯъбаҳои коргардонии кино ва драматургони кино, мактабҳои олӣ, хатмкунандагони шӯъбаҳои коргардони кино ва драматургони мактабҳои олии ИДМ, Гурҷистон, Латвия, Литва, Эстония иштирок карда метавонанд. Шарти асосии озмун пешниҳоди филми нахустини мустақилонаи бадеӣ ё мустанад мебошад.