« САФИНА » ДАР СУҒД

Ноҳияи Б.Ғафуров,31 август.(АМИТ «Ховар»,С. Юсуфӣ, М. Амонов).- Имрўз бо ташаббус ва дастгирии мақомоти иҷроияи ҳокимияти давлатии ноҳияи Б.Ғафуров мактаб-гимназияи нави «Сафина» кушода шуд. Ин таълимгоҳи бошукўҳ бо ташаббус ва маблағгузории  шаҳрванд Абдуғаффоров бунёд гардидааст.Дар таълимгоҳи мазкур 250 нафар муҳассилин асосан аз забони олмонӣ, англисиву хитоӣ таълим мегиранд. Таълим бо ду забон- тоҷикӣ ва русӣ ба роҳ монда шудааст. Хонандагони гимназия бо хўроки гарм ва нақлиёт барои рафту омад таъминанд. Маблағи таълим 230 сомонӣ мебошад . Дар  мактаб-гимназия асосан талабагон аз шаҳри Хуҷанд, шаҳраки Б.Ғафуров ва шаҳри Чкалови вилояти Суғд таҳсил менамоянд. Омўзгорони хеле ботаҷриба ду нафар профессор, чор нафар Аълочиёни маорифи Ҷумҳурии Тоҷикистон ва дорандагони тахассуси олӣ омодаи таълиманд. Маъмурияти гимназия бо сафоратхонаи Олмон ва Руссия ҳамкории зич дошта, хонандагон бо китобҳои дарсӣ пурра  таъминанд. Мактаб дорои ду майдончаи варзишӣ,ҳавзи шиноварӣ ва лавозимоту  таҷҳизоти мактабӣ  мебошад. Дар расми кушодашавии мактаб-гимназияи «Сафина» раиси ноҳияи Б.Ғафуров Фатҳулло Муҳиддинов , мудири шўъбаи маорифи ноҳияи Б.Ғафуров Дилбар Турсунова, раиси ҷамоати Ёваи ноҳия Ҳотамҷон Фаттоев, намояндаи сафоратхонаи Олмон Фрау Бергер суханронӣ  намуданд.  Бояд гуфт,ки таъсиси ин таълимгоҳ ҳадяи Ҳукумат дар арафаи иди Истиқлолият мебошад.