ТАЛОШ БАРОИ ҲОСИЛИ ФАРОВОН

Турсунзода, 18 август. (АМИТ «Ховар», Ҳотам Рабиев).- «Дар ҳақиқат соли ҷорӣ деҳқонони ноҳияи  мо  дар  масоҳати  2960 гектар ҳосили фаровони  пахта парвариш намудаанд, ки  рӯзҳои наздик  ба ҷамъоварии он  шурӯъ  менамоянд»,- иброз дошт сардори  идораи  кишоварзии  ноҳияи Турсунзода  Ҳабибулло Муллоев  ба хабарнигори АМИТ «Ховар».  Парвариши  ниҳолҳои  пахта, бахусус  дар хоҷагиҳои  «Дӯстӣ»,  ба номи Аскаралӣ  Мирзоев, ба номи  Қурбоналӣ  Бӯриев, « Намуна», «Ҳақиқат» ва дигар хоҷагиҳо  хуб аст. Баланд гаштани нархи  пахта дар бозори  ҷаҳонӣ имкон дод, ки  деҳқонон  ба парвариши   пахта боз ҳам  ҳавасманд шаванд, афзуд Ҳ Муллоев. Дар хоҷагиҳои ноҳияи  Турсунзода  деҳқонони  соҳибтаҷриба хеле зиёданд. Онҳо ҳамасола тавассути меҳнати  самарабахш  ҳосили  фаровони ғалла, пилла, меваю сабзавот ва дигар маҳсулотро  ҷамъ меоранд. Имсол низ кишоварзон   баҳри ҷамъоварии  ҳосили фаровон  саъю кӯшиш доранд. Деҳқонони ноҳия   то имрӯз дар  масоҳати ҳазору  100 гектар кишти  такрорӣ гузаронидаанд.