3 НАФАР ГУМОНБАРОНИ ТАРКИШ ДАР ВИЛОЯТИ СУҒД

Тавре ки иттилоъ дода будем, рӯзи 3 сентябри соли 2010, тахминан соати 08.05 дақиқа дар ҳавлии бинои Шӯъбаи минтақавии мубориза бар зидди ҷинояткориҳои муташаккили РКД ҶТ дар вилояти Суғд аз ҷониби ашхоси ҷинояткори номаълум амали террористӣ содир  шуда буд. Дар натиҷа 2 нафар кормандони Шӯъбаи мазкур — қаторӣ Маёқубов А. А. дар ҷойи ҳодиса ва лейтенанти калон Маҳкамов А. Щ. аз ҳисоби бардоштани ҷароҳатҳои вазнини ҷисмонӣ дар бемористон ба ҳалокат расида, 28 нафари дигар ҷароҳатҳои гуногуни ҷисмонӣ бардоштанд. Оид ба ҳодисаи мазкур тибқи моддаҳои 179 қисми 3 ва 104 қисми 2 КҶ ҶТ парвандаи ҷиноятӣ оғоз карда шудааст. Барои муайян ва дастгир намудани нафарони дар ин ҷинояти ваҳшиёна дастдошта аз тарафи кормандони РКДАМ ҶТ дар вилояти Суғд  силсилаи амалиётҳои оперативӣ-ҷустуҷӯӣ гузаронида шуда, дар натиҷа рӯзи 12 сентябри соли 2010 3 нафар шахсони гумонбар дастгир карда шуданд. Нисбати онҳо аз ҷониби гурӯҳи фаврӣ-тафтишотии прокуратураи вилояти Суғд тафтишоти пешакӣ идома дорад. Ному насаби дастгиршудагон бо мақсади халалдор насохтани ҷараёни тафтишоти пешакӣ ошкор карда намешавад. Аз  рафти тафтишот ва қарори қонунии қабулшуда иловатан хабар дода мешавад. Дар ин хусус ба АМИТ «Ховар» аз Маркази робитаҳои ҷамъиятии КДАМ ҶТ хабар доданд.