АЗ 435 ҶОЙИ КОРИИ ХОЛӢ 20 ҶОЙ ИНТИХОБ ГАРДИД

Душанбе, 16 cентябр.(АМИТ «Ховар», Лаззат Диловарзод)-. Бино ба иттилои бахши робита бо ҷомеаи Вазорати меҳнат ва ҳифзи иҷтимоии аҳолӣ, дар ярмаркаи ҷойҳои  кории  холӣ, ки Раёсати Агентии давлатии ҳифзи иҷтимоӣ, шуғли аҳолӣ ва муҳоҷират дар шаҳри Турсунзода бо иштироки муассисаҳои таълимии сохторҳои зертобеи Агентӣ дар боғи фарҳангии шаҳр доир  намуданд, 34 корхонаю муассисаҳо  435 ҷойҳои кории холиро барои корҷӯён пешниҳод  карданд.      Тибқи мувофиқаи қаблӣ бо шабакаи ТВ «Регар» ва дигар васоити ахбори омма, гузоришу мусоҳибаҳо оид ба баргузории ярмарка ва ташкили  ин чорабинӣ, ки барои бо шуғл фаро гирифтани шаҳрвандони бекор мусоидат мекард, сабт гардида, пешкаши шаҳрвандон гардонида шуд. Ҷиҳати инъикоси ярмарка дар ВАО мудири шӯъбаи маорифи шаҳри Турсунзода М. Азизова, сардори Раёсати Агентии давлатии ҳифзи иҷтимоӣ, шуғли аҳолӣ ва муҳоҷират дар шаҳри Турсунзода Ш. Камолов ва чанде аз касбомӯзони марказ фикру мулоҳизаҳои хешро баён намуданд.     Дар ярмаркаи мазкур танҳо 20 нафар корҷӯён бо маоши барои онҳо мувофиқ барои худ ҷойи кори доимӣ пайдо намуда, 12 нафар барои омӯзиши касбҳо роҳхат гирифтанд.