БАРРАСИИ МАСОИЛИ ДОХИЛШАВИИ ТОҶИКИСТОН БА СУС

Душанбе, 6 сентябр. (АМИТ «Ховар», Бекназари Абӯбакр). — Дар Маркази миллии патенту иттилооти Вазорати рушди иқтисод ва савдои Ҷумҳурии Тоҷикистон 3 сентябр семинари миллӣ таҳти унвони «Дар бораи Протокол ба Созишномаи Мадрид ҷиҳати бақайдгирии байналмилалии тамғаҳои молӣ» баргузор гардид. Дар он роҳбарияти Созмони умумиҷаҳонии моликияти зеҳнӣ ва масъулини вазоратҳои рушди иқтисод ва савдо, адлия, корҳои хориҷӣ ва судҳои иқтисодии кишвар иштирок карданд. Дар ҷараёни семинар масъалаҳои тақвият бахшидан ба рушди системаи ҳифзи моликияти саноатӣ дар Тоҷикистон ва раванди дохилшавии Ҷумҳурии Тоҷикистон ба Созмони Умумиҷаҳонии Савдо, ки яке аз самтҳои муҳими он ҳамоҳангсозии қонунҳои миллӣ ба санадҳои байналмилалӣ ва ҳамроҳшавии кишвар ба санадҳои байналмилалии соҳаи моликияти зеҳнӣ аст, баррасӣ гардид. Маврид ба зикр аст, ки дохилшавии Ҷумҳурии Тоҷикистон ба СУС барои рушди сиёсати иқтисодӣ афзалиятнок ва муҳим мебошад.