БЕМОРИИ СИЛ АФЗОИШ МЕЁБАД

Душанбе, 27 сентябр. (АМИТ «Ховар», Лаззат Диловарзод).- Бино ба маълумоти маркази санитарӣ — эпидемологии минтақаи  Кӯлоб, дар давоми 8 моҳи соли ҷорӣ мутахассисони фтизиатрӣ бори аввал дар 10 ноҳияи минтақаи мазкур 898 беморони ба касалии сил гирифторро муайян карданд.    Бино ба маълумоти ҳамин манбаъ, 56 ҳодисаи ба қайд гирифтани ин беморӣ нисбат ба ҳамин давраи соли гузашта зиёд аст.    Ҳолати аз ҳама пуризтироб дар ноҳияҳои Восеъ ва Ҳамадонӣ боқӣ мемонад. Нишондоди аз ҳама баланди беморӣ чун пештар дар ноҳияи Восеъ ба қайд гирифта шудааст. Дар ин ноҳия бори аввал 230 нафар беморони мубталои  сил муайян  карда шуданд, ки нисбат ба соли 2009 16 нафар зиёд аст. Ҳамчунин дар натиҷаи санҷиш 151 нафар беморони гирифтори сил  дар ноҳияи Ҳамадонӣ ва 193 нафар   дар шаҳри Кӯлоб муайян карда шуданд.    Бо вуҷуди он ки ташкилоти байналмилалии тандурустӣ (ВОЗ)  барномаҳоеро дар роҳи аз байн бурдани ин беморӣ дар Тоҷикистон бо даҳҳо миллион доллар роҳандозӣ намудааст, аммо ин беморӣ рӯ ба афзоиш дорад-чаро? Ин саволи рӯз аст, ки  ба он  Вазорати тандурустии ҷумҳурӣ  ва мутахассисони соҳаи он бояд посух диҳанд.