ДАРГУЗАШТИ ШАЙХИ БУЗУРГ

      Душанбе, 7 сентябр.(АМИТ «Ховар», Марзия Саидова).- Яке аз уламои маъруф ва пешвоёни дини мубини ислом, раиси  Маркази исломии Ҷумҳурии Тоҷикистон ва Шӯрои уламои ҷумҳурӣ Ҳоҷӣ Амонуллоҳ Нематзода  баъди бемории  вазнини тӯлонӣ  дар синни 75-  солагӣ дар рӯзи 27-уми моҳи  мубораки Рамазон,  дар даҳаи раҳоӣ аз оташи дӯзах  бо олами ҳастӣ падруд гуфта, рӯҳаш ба  раҳмати илоҳӣ пайваст.       Дар робита ба ин Президенти Ҷумҳурии Тоҷикистон Эмомалӣ Раҳмон  ба пайвандони марҳум,  хешу ақрабо ва шогирдону ихлосмандони  Ҳоҷӣ Амонуллоҳ Неъматзода тасаллият баён кард.        Ҳоҷӣ Амонуллоҳ  Неъматзода шахсияте буд, ки умри пурбаракати худро  дар роҳи хидмати  софдилона  ба ислому  мусалмонон, ба халқу Ватан, тарбияи рӯҳонӣ  ва ахлоқии мардум, тарғибу ташвиқи  эҳсони ватандӯстӣ, даъват ба якпорчагӣ, иттиҳоду иттифоқ  ва сулҳу салоҳ  сарф намудааст.         Ҳоҷӣ Амонулоҳ Неъматзода 5 октябри соли  1935 дар  деҳаи Бузургиёни собиқ ноҳияи Обигарм  таваллуд  шудааст.  То соли  1983 ба ҳайси корманди оддӣ  дар муассисаҳои  гуногуни  Ҷумҳурии Тоҷикистон фаъолият кардааст. Аз соли 1983 то соли 1989 ба ҳайси  имоми панҷвақта  дар масҷиди ҷомеъи  ба номи Шоҳмансури шаҳри Душанбе, аз соли 1989 то соли 1993  имоми панҷвақтаи масҷиди ҷомеъи  ба номи Ҳазрати Мавлоно Яъқуби Чархии ноҳияи Рӯдакӣ  ва аз соли 1993 то соли 1996 ба ҳайси  хатиби масҷиди ҷомеъи мазкур  кор кардааст.  Аз соли 1996 то соли 1997  ба вазифаи Муфтии Ҷумҳурии Тоҷикистон ва аз соли  1997  ба вазифаи раиси  Маркази исломӣ  ва раиси Шӯрои уламои  Ҷумҳурии Тоҷикистон  интихоб шуд ва то охири умри худ  дар ин вазифаҳо кор ва фаъолият кардааст.       Амонуллоҳ Неъматзода узви чандин созмонҳои байналмилалӣ, аз ҷумла узви Шӯрои адёни  Иттиҳоди Давлатҳои Мустақил, узви Ҷамъияти  Даъваи Олами Исломӣ  дар  Ҷамоҳири Арабии Либия буд.        Хидматҳои Амонуллоҳ Неъматзода  дар пешрафти фаъолияти масҷидҳо, пешгирӣ аз ҳар гуна равияҳои  тундраву ифротгаро калон аст. Тӯли солҳои фаъолияташ Ҳоҷӣ Амонуллоҳ Неъматзода  дар интишори таълимоти мазҳаби ҳанафӣ, боло бурдани  маърифати исломӣ  хизматҳои шоён намудааст.