ХАДАМОТИ ЗИДДИИНҲИСОРӢ САДДИ РОҲ МЕШАВАД

Душанбе, 29 сентябр. (АМИТ «Ховар», Лаззат Диловарзод).- Вақтҳои наздик нархи сӯзишворӣ бетағйир боқӣ мемонад,- иброз доштанд аз Хадамоти зиддиинҳисории назди Ҳукумати ҷумҳурӣ ба мухбири АМИТ «Ховар».    Бино ба иттилои ҳамин манбаъ, бо мақсади пешгирии ба таври сунъӣ боло бурдани нархи сӯзишворӣ дар бозори дохилии кишвар ва беасос баланд  бардоштани нарх гурӯҳи корӣ таъсис дода шудааст.    Имрӯз нарх аз ҷониби панҷ ширкати калонтарини воридкунандаи сӯзишворӣ назорат ва танзим карда мешавад. Ҳамчунин, Хадамоти зиддиинҳисорӣ дар мавриди  аз ҷониби ширкатҳои алоҳида беасос баланд бардоштани нарх садди роҳ аст.    Тибқи маълумоти Вазорати рушди иқтисод ва савдо айни замон нархи сӯзишворӣ дар пойтахт баъди моҳи майи соли ҷорӣ бетағйир боқӣ мондааст. Алҳол дар нуқтаҳои фурӯшӣ сӯзишвории пойтахт қиммати 1 литр сӯзишвории навъи АИ-92 4 сомонию 20 дирам  ва   АИ-95 4 сомонию 50 дирам нигоҳ дошта мешавад.