ИНТИҚОЛИ ГАЗИ ТАБИӢ 10 МАРОТИБА КАМТАР ШУД

Душанбе, 29 сентябр.(АМИТ «Ховар», Марзия Саидова).-Масъалаи ҷамъоварии маблағҳо дар соҳаи газтаъминкунӣ аз ҷониби Ҷамъияти саҳҳомии шакли кушодаи «Душанбегаз» ҳамчун мушкилоти асосӣ дар ин соҳа боқӣ мондааст. Ҷамъоварии маблағи интиқоли гази табиӣ дар 8 моҳи соли ҷорӣ 92,6 фоизро ташкил дода,  67,1 фоизи он ба аҳолӣ рост меояд. Дар ҳашт моҳи соли ҷорӣ ҳаҷми интиқоли гази табиӣ 1621,5 ҳазор  м3-ро ташкил намуд. Ба аҳолӣ бошад ҳамагӣ  339,9 ҳазор м3 гази табиӣ интиқол гардид, ки нисбат ба  8 моҳи соли гузашта 10 маротиба камтар мебошад. Ғайр аз ин дар санаи 10 августи соли 2010 аз миқдори умумии муштариён, ки 108508 ададро ташкил медиҳанд, танҳо ба 432 муштарӣ (0,4 %) гази табиӣ интиқол дода шудааст. Масъалаи мазкур дар иҷлосияи сеюми Маҷлиси вакилони халқи шаҳри Душанбе баррасӣ гардида, зикр шуд, ки дар ин самт бояд роҳбарияти ҶСК «Душанбегаз»  ва сохтори болоии он ҶСК «Тоҷиктрансгаз»  чораҳои зарурӣ андешанд. Зеро интиқоли гази табиӣ дар мавсими зимистон зери суол буда, аз ин рӯ тамоми мушкилот ба системаи барқтаъминкунии шаҳр рост меояд.   Вобаста ба ҳолати ҷойдошта дар ҶСК “Душанбегаз”,   ҶСК «Тоҷиктрансгаз»-ро мебояд ҷиҳати мӯътадилгардонии фаъолияти истеҳсоливу иқтисодӣ, иҷтимоиву молиявии зерсохтори худ чораҳои таъхирнопазир андешида, бобати интиқоли гази табиӣ ба муштариёни худ дар пойтахт дар мавсими зимистони имсола тадбирҳои заруриро амалӣ созад.