ИШТИРОКИ КӮЧИҲОИ АФҒОНИСТОН ДАР ИНТИХОБОТ

          Душанбе, 16 сентябр.(АМИТ «Ховар», Марзия Саидова).- «Дари беш аз 900 маркази райъдиҳӣ дар Афғонистон баста  шудааст», гуфт дар сӯҳбат ба хабарнигори АМИТ «Ховар» атташеи матбуоти сафорати Ҷумҳурии Исломии Афғонистон дар Ҷумҳурии Тоҷикистон Шамсулҳақи Ориёнфар. Сабаби баста гардидани дари беш аз 900 маркази райъдиҳӣ таъмин набудани амният ва нооромӣ дар бархе аз минтақаҳои ҷанубии Афғонистон аст, афзуд Ш. Ориёнфар.             Мавсуф гуфт, ки дуюмин давраи интихоботи парлумонӣ -Шӯрои Миллӣ дар Афғонистон 18 сентябри соли 2010 баргузор гардида, дар он ҳудуди 10 миллион мардуми Афғонистон  райъ медиҳанд. Дар маҷмӯъ,  дар рӯзи интихобот  наздики 6 ҳазор марказ  ва беш аз 18 ҳазор  маҳали райъдиҳӣ фаъолият мекунанд. Аз 2 ҳазору  556 нафар номзадҳо 406 нафарашон занон мебошанд. Инчунин, 42 номзад ба вакилиро намояндагони кӯчиҳои Афғонистон ташкил медиҳанд. Мавриди зикр аст, ки парлумони Афғонистон -Шӯрои Миллӣ  аз 250 вакил иборат аст.           Ҷараёни баргузории интихоботи парлумонии Афғонистонро нозирону намояндагони 40 кишвари ҷаҳон ва созмонҳои бонуфузи байналмилалӣ, аз қабили СММ, САҲА ва ғайраҳо мушоҳида менамоянд.             Бобати таъмини амният ва иштироки мардум дар интихобот нерӯҳои  Артиши миллӣ, полиси миллии Афғонистон ва нерӯҳои Паймони Атлантикаи Шимолӣ /НАТО/ сафарбар мегарданд.             Натиҷаҳои интихоботи парлумонӣ дар Афғонистон баъд аз 1 моҳу 8 рӯз, яъне дар санаи 26 октябри соли равон муайян мегарданд.