КӮМАК БА ОИЛАҲОИ ҚУРБОНИЁНИ КАМАРОБ

Душанбе, 27 сентябр.(АМИТ «Ховар», Марзия Саидова).- Шаҳрдории Душанбе ба  оилаҳои ду нафар сарбози дар ҳодисаҳои нангини дараи Камароб ҳалокгашта -Раҳмонов Неъматулло Ҳасанович (истиқоматкунандаи ноҳияи Фирдавсӣ) ва Абдуллоев Баҳром Файзуллоевич (сокини ноҳияи Сино) кӯмаки яквақтаина расонд. Кӯмаки яквақтаина бо мақсади иҷрои Қарори Маҷлиси вакилони халқи шаҳри Душанбе аз 23 сентябри соли 2010 дар робита ба маҳкумсозии ҳодисаҳои 19 сентябри соли 2010 дар дараи Камароби ноҳияи Рашт ба вуқӯъ пайваста  ва дастгирии маънавию молиявии оилаҳои сарбозони аз шаҳри Душанбе дар ин воқеа қурбонгардида расонида шуд.  Инчунин, дар асоси ин Қарор Раёсати тандурустӣ ва маорифи шаҳри Душанбе вазифадор гардиданд, ки ҷиҳати расонидани хизматрасонии тиббии пайваста ва ба боғча фаро гирифтани фарзанди сарбози марҳум Раҳмонов Неъматулло Ҳасанович чораҳои зарурӣ андешанд.  Тибқи иттилои котиби матбуотии Раиси шаҳри Душанбе Шавкат Саидов, кӯмаки молиявии яквақтаинаро бо изҳори тасаллият аз номи Раиси шаҳри Душанбе Маҳмадсаид Убайдуллоев,  муовини Раиси шаҳр Санавбар Раҳимова ва раисони комиссияҳои доимии Маҷлиси вакилони халқи шаҳри Душанбе Абдуғаффор Рауфӣ ва Абдулҳамид Самадов ба пайвандони қурбоншудагон расониданд.