МУБОРИЗА БАР ЗИДДИ ФУРӮШИ ОДАМОН

          Душанбе, 24 сентябр. (АМИТ «Ховар», Фарангис Раҳимова). – Яке аз масъалаҳои муҳими мулоқоти панҷуми вазирони корҳои хориҷии Афғонистон, Покистон, Русия ва Тоҷикистон, ки 22 сентябри соли 2010 дар шаҳри Ню Йорк дар ҷараёни иҷлосияи 65-уми Маҷмаи умумии Созмони Милали Муттаҳид баргузор гардид, ин мубориза ба муқобили хариду фурӯши одамон буд.             Дар мулоқот Ҳамрохон Зарифӣ, Вазири корҳои хориҷии Ҷумҳурии Тоҷикистон иштирок ва суханронӣ намуд.  Зимни мулоқот қайд гардид, ки имрӯз афзоиши теъдоди ҷиноятҳои марбут ба хариду фурӯши одамон ба яке аз масъалаҳои доғи рӯз табдил ёфтааст. Дар ҷаласа, ҳамчунин, зарурати муттаҳидсозии талошҳо ва андешидани чораҳои таъхирнопазир ҷиҳати муборизаи муассир ба муқобили хариду фурӯши одамон таъкид гардид.             Вазирон қабули Нақшаи глобалии амалиёти СММ оид ба мубориза ба муқобили хариду фурӯши одамонро  пазируфтанд. Ҷонибҳо дастгирии худро аз фаъолияти Раёсати СММ оид ба ҷоннок намудани мубориза бар зидди қочоқи маводи мухаддир ва ҷиноятҳои вобаста ба он баён намуданд.             Дар поёни мулоқот ҷонибҳо изҳорот оид ба талошҳои ҷаҳонӣ баҳри мубориза ба муқобили хариду фурӯши одамонро қабул карданд.             Дар ин бора аз Департаменти иттилоотии Вазорати корҳои хориҷии ҶТ ба АМИТ «Ховар» хабар доданд.