МУЛОҚОТ БО ШОИР

      Душанбе,4 сентябр. (АМИТ «Ховар», Дилшодаи Ҷонмард).-Имрӯз дар китобхонаи давлатии бачагонаи ҷумҳуриявии ба номи Мирсаид Миршакар дар мавзӯи «Офарандагони китоб» ва муаррифии китобҳои шоири маърӯф Назар Табарзодаи Деҳбаландӣ ҷамъомад баргузор гардид.      Дар мулоқот директори китобхона Қурбон Афғонов дар бораи ҳаёт ва эҷодиёти Назар Табарзодаи Деҳбаландӣ сухан ронд.     Адибон ва хонандагони фаъоли китобхона андешаҳояшонро дар бораи асарҳои шоир, аз ҷумла, китобҳои «Бобои ман деҳқон аст» ва «Тайёраи нав омад» баён намуданд.     Мақсади вохӯрӣ муаррифии китобҳои нависандагону шоирон, шиносоии онҳо бо аҳли адаб, намоиши дастовардҳои соҳаи табъу нашр, фаъолияти китобдорӣ ва аз наздик ошно намудани хонандагон бо олимону адибон, ҷалби кӯдакону наврасон ба китобхонӣ ва ба ин васила ошно сохтани онҳо бо китобҳои нав ва ташвиқу тарғиби асарҳои замонавӣ мебошад      Маҷмӯаҳои ашъори Назар Табарзодаи Деҳбаландӣ барои бачаҳо таҳти номҳои «Автобуси лаҷомдор», «Сайри кӯҳсор», «Ҷӯяҳои сабз», «Харбузаи барги най», «Мактабам» ва ғайраҳо ба табъ расидаанд.       Шоир инчунин, барои калонсолон низ шеърҳои зиёд эҷод намудааст. Онҳо дар китобҳои «Дуои сабз» ва «Рӯҳафзо» гирд оварда шудаанд.