МУЛОҚОТИ ВАКИЛОНИ МАҶЛИСИ НАМОЯНДАГОН ДАР СУҒД

Душанбе, 18 сентябр. (АМИТ «Ховар», Дилшодаи Ҷонмард).- Дар ин рӯзҳо дар вилоёт ва навоҳии тобеи ҷумҳурӣ мулоқоту вохӯриҳои вакилони Маҷлиси намояндагон бо интихобкунандагонашон идома дорад. Дар доираи чунин мулоқот имрӯз вакилони Маҷлиси намояндагон – Насрулло Маҳмудов, Назира Турдиматова, Шодӣ Шабдолов, Исмоил Талбаков, Маҳмадшариф Нозимов, Саттор Холов дар ноҳияҳои Конибодом, Зафаробод ва Истаравшан бо интихобкунандагони худ мулоқот намуданд. Тавре котиби матбуотии Маҷлиси намояндагон Муҳаммадато Султонов ба мухбири АМИТ «Ховар»  иттилоъ дод, зимни ин мулоқот вакилони Маҷлиси намояндагон нуктаҳои муҳимтарини сиёсати пешгирифтаи Ҳукумати ҶТ,  мавқеи парлумон ва дигар аҳзоби сиёсиро дар таъмини се ҷиҳати асосии рушди иқтисодиёти Тоҷикистон – таъмини истиқлолияти энергетикӣ, амнияти озуқаворӣ ва баромадан аз бунбасти коммуникатсиониро муфассал шарҳ доданд. Зимни саволу ҷавоб интихобкунандагон дар мавриди масъалаҳои рӯзмарраи иҷтимоӣ, аз ҷумла омодагиҳо ба муносибати 20-солагии Истиқлолияти давлатии Ҷумҳурии Тоҷикистон, таъминот бо оби нӯшокӣ, таъмини ҷавонон бо ҷойи кор ва дигар масъалаҳои рӯзмарра табодули назар намуданд.