НАХУСТИН КОРХОНАИ ХИШТ ДАР БАДАХШОН

Бадахшон, 30 сентябр. (АМИТ «Ховар», Л.Додо).- Дар деҳаи Водхуди ноҳияи Ванҷ корхонаи  хиштбарорӣ  ба фаъолият  шурӯъ намуд. Имрӯз дар вилоят талабот ба  хишт хеле  зиёд буда, ин нахустин корхонаи   хиштбарорӣ   дар  ВМКБ  мебошад. Дар наздикии корхона дар мавзеи Лангар барои  истеҳсоли хишт ашёи хоми  фаровон мавҷуд аст, ки  хокаи онро ҳанӯз дар даврони Шӯравӣ дар  озмоишгоҳҳои   махсуси  шаҳри Маскав санҷида буданду он беҳтарин дониста шуд. Иқтидори пурраи корхона дар як навбат 170 ҳазор  дона хишт аст. Имрӯз дар ин корхона 20-нафар коргар кор мекунад, ки  музди миёнаи маошашон 500 сомониро ташкил медиҳад. Роҳбарияти  корхона тасмим гирифтаанд, ки  то охири сол теъдоди коргарони корхонаро ба 100 нафар расонанд.