ОХИРИН МАКТАБ ДАР СУҒД АЗ ВАГОН БАРОВАРДА ШУД

Душанбе, 2 сентябр. (АМИТ «Ховар», Бекназари Абӯбакр). — Мавриди баҳрабардорӣ қарор гирифтани мактаби рақами 63-и шаҳраки Сомониёни шаҳри Исфара Супориши Президенти мамлакат ва Барномаи вилоятии аз вагонҳо берун кардани мактабҳоро дар вилояти Суғд пурра амалӣ гардонид. Мактаби мазкур расман 1 сентябри соли ҷорӣ ба фаъолият оғоз кард. Он барои 240 нафар хонанда пешбинӣ шуда, бо маблағгузории мақомоти иҷроияи ҳокимияти давлатии вилояти Суғд бунёд гардидааст. Бо супориши раиси вилоят сохтмончиён дар давоми як сол мактабро бунёд намуданд, зеро шароити таҳсил дар ин шаҳрак басо ташвишовар буд. Барои бунёди мактаби нав 1 миллиону 200 ҳазор сомонӣ маблағ масраф гардид. Раиси вилояти Суғд дар ин тантанаи муборак, ки аҳли маорифи шаҳри Исфара ҷамъ омада буданд, ба кормандони соҳа дар вазъияти тантанавӣ калиди ин иншооти замонавиро супорида, ҳамчунин барои хонандагони мактаб 4 дона компютер ва лавозимоти мактабӣ тақдим  намуд.